Entries by editor

【音樂小毒L】令人沉迷的 “Volotic”

自從有左智能手機,平板電腦,做音樂玩音樂都多左好多「花臣」。近日小編就無端端迷上呢一隻叫 “Volotic” 嘅apps,其實係一款類似Loop Synth嘅sequencer,玩家可以係格仔上面擺樂器聲,設計發聲嘅模式,好似打機咁製作自己獨特嘅音樂。具實驗性得黎又好玩,音樂小毒L一定like:     文:Kenji

【Guitar Tech】Lehle Sunday Driver體驗

Lehle Sunday Driver是一款二合一產品, 將buffer與clean boost封裝​​在一個可愛的小盒子中。 它的外型設計首先就非常有意思:市面上的單塊結他效果器(Effect Pedal)幾乎都是千篇一律的鑄鋁盒,盒蓋在底部,需要換電池的話要拿起單塊,將底蓋拆下之後再操作;而現在大家都喜歡將單塊固定在pedalboard上,這樣的操作會很麻煩;而Lehle的螺絲是在正面的,可以在不用從pedalboard上取下的情況下打開對內部進行操作。     另一個貼心的設計是Lehle 單塊的固定方式:在Lehle官方測試強度的圖上我們可以看出單塊是固定在一塊木板上,並且沒有看到通常會使用的魔術貼。在包裝盒中,附送了兩個墊片與兩枚螺絲。單塊的底板上也有兩個洞,原來是用來將附送的螺絲穿過並固定在pedalboard上的。如果是木質的pedalboard就可以直接鑽入木頭。如果是類似pedaltrain這種金屬材料的則需要事先打一個略小的孔,然後用螺絲穿過。這樣的固定方式比起傳統的魔術貼固定好得多, 你再也不用擔心長時間放置、旅途中或者演出操作時令單塊從pedalboard上慢慢移位了。並且這種固定方式看起來非常整潔。   Lehle Sunday drirver的面板上是一個旋鈕(knob),用來調節clean boost增益強度的。這個旋鈕並沒有使用傳統單塊會用的設計(見圖), 這種旋鈕的問題在於雖然調節時方便,但現在大家都傾向於將音色調好之後固定在一個位置帶到不同的地方去演出。在旅途中旋鈕的方向很可能發生改變,包括演出的時候腳也可能會碰到而突然改變設置。有些人將它拆下只留下一根「光棍」,有些人用膠布將它固定起來,有些人則在單塊外殼上做上標記,演出前將每個旋鈕復原。這些方法都太笨拙, 而且不是一勞永逸。Lehle於是將這個旋鈕的形狀做得很扁,沉進外殼中,這樣外力幾乎不能改變它的位置,保護得相當好。調節也很方便,手感很好。   Sunday driver還有個版本叫做Sunday Driver Switch, 面板上還有一個巨大的腳踏「踩釘」。這個踩釘不會像普通的踩釘一樣會有機件勞損問題,並且更大,更容易踩中,腳感也非常好。 它有一個開關設置為true bypass(TS)或buffered bypass(TB)。這樣你可以將clean boost值關小到零, 然後設置到true bypass(TS),這樣踩釘就相當於一個單純的buffer開關。你也可以將clean boost設置到理想的值, 然後bypass設置到buffered bypass(TB),這個時候buffer永遠是開著的,踩釘用來做clean boost的開關。 它的另一個主要開關(S/D),用來在”Sunday” 和” line driver”兩個模式之間切換,兩個都是經buffer了的. Line driver 像很多其他buffer一樣,輸入阻抗是1M ohm,而Sunday 檔是4M ohm,這個超高的輸入阻抗可以讓你的信號更加細膩溫暖,高頻更酥麻,這個聲音就是這塊buffer名字的由來。     文:Jules 圖片來源:網絡    

【男人嘅浪漫】Mojave Mic是如何鍊成的

  市面上銷情好嘅錄音器材通常會呈兩極化,一類係「價廉物不美」嘅入門類產品(無辦法,一分錢一分貨),另一類係專業用器材,雖然質素的確好,一定有捧場客,但係定價對於想進階嘅初哥黎講就偏高。以錄音室常用嘅電容mic(condensor microphone)為例,入門級產品可能一千蚊已經有交易,但係一支業界標準嘅Neumann U87定價大概2萬;於是一啲中價產品例如係美國好紅嘅“Mojave Audio”,因極高嘅性價比而大受歡迎。題外話,香港都有唔少識貨之人查詢呢款“Mojave mic”,但多數人會將“Mojave”讀作“無J”。本來好地地“用無J”,結果聽起黎變左“無J用”。小編要係度澄清,Mojave應讀作”霧.哈.Fi”!唔單止有J用,而且陽剛味十足,皆因Mojave成名背後有一段男人嘅浪漫…   故事要從美國人David Royer嘅創業史講起:出生係加州,David自小沉迷古典音樂及鄉村民謠,21歲已經係自家車庫嘗試製作同錄音,係個不則不扣嘅”home studio”音樂人。但佢對當時可以買到嘅錄音mic質素極為不滿,於是萌生左自行研發mic嘅念頭, 而且仲早早為呢個計劃中嘅自家廠牌定名為”Mojave Audio”。   後來呢個念頭發展成為David畢生嘅奮鬥目標,從早期無數次自行摸索同試驗各種線路設計開始打好根基,到後來係美國海軍服役成為「聲納技術員」掌握左進階音頻技術而「升呢」,歷時約20年時間,佢陸續設計出Mojave MA系列嘅電容mic,同部分錄音前級設備。自此David唔單止有mic用,連帶當時一班出名嘅producer都好buy 佢隻聲,人人都爭住要有一枝!咁樣將自己嘅興趣發展成事業,點會唔係男人嘅浪漫先?而且仲係唔少女士口中「有上進心」添啦(希望至少有一個女士可以堅持見證呢20年嘅上近心啦! David婚姻狀況不詳…) 故事講到呢度係未完嘅,因為最為人熟悉嘅一幕,係David Royer將ribbon mic(鋁片mic)技術改良成為現代適用嘅規格 — 亦即係著名嘅 “Royer Lab R-121″! 憑著呢個產品David獲得三個Technical Grammy Award技術大獎,踏上事業高峰… (限於篇幅,關於Ribbon mic嘅細節擇日再述) 言歸正傳,Mojave Audio MA系列電容mic,最大特色係型號MA100,MA200,MA300均有「膽」(電子管Tube)同「原子粒」(FET)兩種版本,熟悉hifi嘅朋友一定會瞭解兩種線路嘅聲音分別。其內部採用最精良嘅零件,包括Jenson 線圈,”NOS” (new old stock)舊庫存軍用級嘅電子管及原子粒。咁好嘅用料及設計,定價都只係屬中價,只因Mojave 係海外人手裝嵌節省成本。雖然係咁,但所有成品都會運返美國由David Royer親自作嚴格QC,每枝出貨前都會Run in十數小時以達至最佳表現!能夠將節省嘅成本回饋消費者,而又保持產品質素,難怪Mojave Audio係無做大型市場推廣下卻一直廣受美國製作行內人士支持。 一齊黎睇睇MA系列電容mic嘅長相先: 規格詳情可查閱:http://www.mojaveaudio.com/product.html   文:Kenji 圖片來源:網絡

【盛事】2016 NAMM TEC Award獎項一覽

通常啲電子產品會宣傳自己係乜獎物獎嘅得主,個包裝充斥著各式各樣嘅logo,音頻產品都唔例外。以下呢個logo,熟悉錄音器材嘅巴打一定唔會陌生:     呢個就係傳說中嘅“TEC Award”,號稱係Pro Audio界嘅奧斯卡頒獎禮,係“NAMM”美國樂器貿易組織協會每年籌辦“NAMM show”(即係一個樂器,音樂製作設備展銷會…)裏面嘅重頭戲。今年嘅獎項啱啱新鮮出爐,一齊睇睇有乜好嘢:     最佳信號放大類器材 (錄音室及擴音系統類):Antelope Audio — Statori 監聽控制器       最佳電腦音樂硬件:Universal Audio —  Apollo 8p Thunderbolt 2 音頻界面       最佳智能手機及平板類產品:Shure — Motive MV88 IOS 數碼立體聲電容mic       最佳耳機:Audio Technica — ATH-R70X PRO 監聽耳機       最佳mic pre(話筒前級放大): MANELY LABS — Manley Force   […]

【Jack頭保衛戰】回顧TRS音頻插頭的前世今生

  傳聞Apple將會淘汰傳統 3.5mm耳機jack頭,換言之嚟緊iphone 7跟機耳機將會係獨家專利嘅Lightening頭。雖然消息未經官方證實,但已經惹嚟網上近20萬聯署要求Apple要三思:Apple作為科技界龍頭,一旦改變耳機插頭格式,舊格式嘅電話耳機產品就會被淘汰,其他生產商或會被逼跟隨呢個改變,就算到時有”轉插”(adaptor)之類推出市場,依然會有大量嘅電子廢料產生,非常唔環保!     睇返今次事件嘅主角“3.5mm 耳機jack頭”究竟有乜來頭? 原來市面上常見嘅“Jack頭”學名又稱為“TRS-Tip Ring Sleeve”頭(見圖),插頭外觀係圓柱狀金屬,由兩個絕緣環分成三個彼此絕緣嘅部分,對應三個銲接點:Tip係正(+),Ring係(-),Sleeve係地線(Ground);“Tip”帶有凹頸,插入插座後可以被扣實;標準TRS頭直徑1/4寸(6.35mm),通常用於專業器材傳送平衡單聲道(mono balance signal);為左減省空間,headphone用TRS插係一種迷你版嘅TRS,1/8寸(3.5mm)直徑,又稱為mini TRS,用於傳送一組雙聲道信號(stereo signal),tip係左,ring係右,sleeve係地線(Ground)。同一個設計,亦會搵到TS,TRRS及再迷你版嘅TS(2.5mm),視乎絕緣環數量。TS係非平衡單聲道(unbalanced mono);TRRS用於智能電話,多出嚟既焊點係mic信號。     TRS起源于舊式電話系統,最早可以追溯到1878年。以前嘅電話需要名副其實“接線生”,將通話雙方嘅線路,係線路板上面用jack線互相接通。當時嘅插頭近似仍然沿用嘅GPO頭,亦稱“B Gauge”,因為Tip嘅凹頭比較淺容易鬆脫,所以演化成後來嘅“TRS家族”。TRS Jack亦被為“A Gauge”。 TRS 頭呢個設計已經有成百年既歷史,經得起時間嘅考驗。如果你都覺得需要參與“保衛戰”,以下聯署你都可以一齊參與: http://action.sumofus.org/a/iphone-headphone-jack/?sub=homepage     文:Kenji 圖片來源:網絡    

音箱Active 定passive?「有源」又「無源」:搞邊科?

音箱所謂的「有源」,「無源」指的是需要接駁電源與否。選擇有源或者無源音箱實在是「人生交叉點」,音響發燒友最瞭解其中的苦處。這個選擇也是組裝家庭影音系統時所做的最重要決定,因為當中涉及電源分配和駁線的麻煩。 另一組常見的音箱專有名詞Active(主動)和 Passive (被動)發燒友也會經常提及。但這些字眼聽在一般消費者耳中,其實十分混淆。可能基於某些商業理由,並非所有的廠商和專家都會澄清這些字眼的應用。 就讓我們試圖來整理出當中的分野,以及分析這幾種類型各自的優點和缺點。   “Active”有源音箱 Active(主動)是形容「分頻」這個步驟。 分頻需要分頻器(crossover),信號在抵達功放(power amp)之前會被分頻器“主動”分成不同的頻段(例如低頻,高頻,有時會有“中頻”);這幾個分開的頻段分別經過各自的功放通道被放大,再推動音箱裡面不同尺寸的揚聲器單元(driver),例如低音單元,高音單元。 Active有源音箱內置電子分頻器和功放等部件均需要電源驅動,所以“Active”音箱需要插電,即一定是“有源”的。 它的接駁方式是直接將平衡信號(Balanced signal)經XLR線輸入(不少產品亦同時提供非平衡的輸入,例如RCA紅白線接口)。優點是具有更高的保真度,更少的互調失真(IMD),更高的動態範圍和更大的輸出聲壓級(SPL)。這些優點令到它們被廣泛應用在擴音工程和錄音室監聽。   “Passive”無源音箱 同樣,Passive(被動)也指分頻的步驟。所謂“被動的分頻”,是依賴線路設計,利用電容,電阻電感等元件對不同頻段信號進行過濾的特性而達到分頻的效果,猶豫一個“被動的分頻器(passive crossover)”。經過功放後的信號直接輸出到passive音箱,經過被動分頻後推動不同揚聲器單元。由於沒有內置的電子分頻器和功放,passive音箱不需要插電,所以又稱為「無源」。重量較輕,(因為重量通常來自內置功放),接駁方便,只需要從外置的功放經喇叭線輸入信號。 雖然有些高級的無源音箱擁有優質的被動分頻效果,但本質上,被動分頻器會因散熱損失多達30%功率。隨著分頻器升溫,揚聲器單元分配到的頻段都會隨住變化,音質也會受影響。 再者,推動無源音箱需要找到一個匹配的功放,這既是一個優點也是一個缺點。 優點是可以自由地升級和更換功放,同一個音箱可以因此而有不同的表現。 缺點是,生產功放的廠家不會知道用戶將會接駁什麼音箱,於是功放會被“過度設計”,以廣泛地適應不同的音箱。但此舉將導致功放變得更昂貴,和耗電。 “Self Powered” 有源音箱 可能你已經覺得很混淆了,剛才不是已經講過「有源」了嗎?Self Powered 其實是泛指所有需要插電的音箱,技術上它是有內置功放和分頻器,但分頻器不一定是Active的,因為分頻器亦可作Passive設計! 這種音箱的整體市場優勢就是更簡化,直接使用。但不知情的消費者可能以為有源音箱比無源音箱更好,實情有源音箱也有可能呈現Passive音箱的特性。 除此之外,有源音箱可以降低成本(不用額外購買功放),減少接駁上面的混亂。出廠的內置功放會更匹配揚聲器單元,無論是active還是passive的線路。而且聲音的表現更穩定,用來建構多音箱的音響系統更容易,因為不需要添置和調教功放和分頻器等器材。   結論 關於選購音箱要active還是passive,有源或者無源的決定,都要根據實際需要和用家自己的預算而定。總之每個技術或系統都有其優劣,我們要做的只能夠確保器材之間達到最匹配的組合,發揮其最大功效。 有些很有經驗的發燒友喜歡教條式地分享自己的做法,其實做個參考也無妨。聰明的用家更需要累積相關的正確知識,訓練自己的耳朵和鑑賞力,始終聲音都是很主觀和抽象的!   文:Kenji 圖片來源:網絡

【同朕check下】究竟欣宜做緊乜?

話說某日小編無意中睇到欣宜有個新既電視廣告,睇完頭果幾個鏡頭已經覺得怪怪地,於是上網搵到段片再睇一次,果然大有發現,cap圖如下:   驟眼望落好似無問題喔,呢個佈置應該係錄音室格局?吸音棉,有個控制室?再睇多張 個片段似乎係講緊欣宜好鍾意音樂,好享受係錄音室錄音既過程啊,但係有幾個位小編覺得耐人尋味: . . 1)控制室裡面用緊果個係咩programe?同常見錄音用既Protools,Logic,Cubase界面都唔多似。可能係video mixing既界面?似啦,旁邊有個類似video mixer既設備,唔通欣宜係錄影緊而唔係錄音?但係個preview係「黑屏」無畫面既?如果係錄影緊,咁個攝影機(師)呢? . . 2)片中所見,欣宜係用手揸dynamic mic,而唔係錄音室最常用既電容mic(condensor)。嗯,非常有嫌疑,可能佢比較中意dynamic mic,但點解要捉住枝mic唱?唔怕有所謂handling noise?即係「卒」mic聲?佢仲好有節奏感咁郁緊喔。(呢part 令我再度懷疑欣宜係錄緊live啊) . . 3)點解唔戴headphone既?通常做voice tracking,應該聽緊背景音樂(BGM)加Click(拍子機)聲。雖然有可能係清唱,但清唱都要聽click掛? . . 4)假設唔戴headphone但係聽緊foldback喇叭。如果係咁咪track埋foldback既聲?但係做multi track錄音既原意就係將每個sound source分開,人聲就只有人聲,撈埋背景音樂唔會增加mixing既難度咩? . . . 本著小事化大既求學問精神,小編用Line訪問左行內一位作風低調既錄音師,係排名C級首位,人稱音響崎玉老師,凡事「一腳踢」既One Kick Man: 我:你好啊崎玉老師,請問你有無睇過欣宜呢個廣告?有幾樣野想請教你   崎玉:有問題?   我:呢個係錄音室?   崎玉:係架喇   我:咁個programe係咩料   崎玉:可能係勁野,除非唔係   我:錄音室用58(Shure SM58)?   崎玉:唔出奇   我:咁欣宜錄音唔使聽foldback?唔需要帶headphone?   崎玉:欣宜出名拍子準,唔洗聽   我:BGM係喇叭播?清唱?   崎玉:年青人,你知道得太多啦,快去做一百下掌上壓先 … […]

[骨頭都識唱歌] 那些年聽歌需要一張「骨片」

  又係那些年… 半個世紀以前,冷戰時期既蘇聯曾經出現過一種唱片形式叫做「roentgenizdat」。條脷打曬棘都發唔到個音?唔緊要,俄文黎,個意思係指「骨頭上面的音樂」。     當時蘇聯政府為左維持共產主義社會既穩定,市民會被禁止接收西方思想。一切西方意識形態產物,包括音樂唱片都係禁物。通常被禁既野下場都只得一個– 越禁越起勁。由於製作唱片既黑膠受管制,有人偷偷地將醫院病人既X光片運出黎,剪成圓形,成為「dub plate」,當作黑膠唱片用來複製或者錄製音樂。雖然音質唔好,容易爛,但勝在價錢平,於是西方音樂繼續透過呢個黑市市場流通。後來隨著冷戰結束,管制放緩,一張張骨頭X光片成為左一代俄國人既集體回憶。似乎同時亦警醒著世人,自由並唔係必然!   呢個網站有齊關於骨頭唱片既歷史,每一張背後既故事,仲可以試聽同購買。 https://x-rayaudio.squarespace.com/lullabyofbirdland/   文:Kenji 圖片來源:網絡,x-ray audio

用mic的基本禮儀

  無錯,就如同用餐要講禮儀,用mic都要講禮儀。雖然你未必有機會上台用mic表演,但K房你都總會去掛?除左做個識用mic之人,留意有以下例子既突發情況出現時,都懂得掩耳以保障聽覺及身心靈健康。    嚴禁拍mic 拍mic係大忌中既大忌,因為枝mic其實係接通住可以產生巨響既喇叭,而喇叭係接通住聽眾既耳膜,你大大力拍落去,等同於一巴打落聽眾對耳仔。如果枝mic無聲,可能係你未開mic;如果枝mic無明顯開關,咁就代表有人會開俾你,保持冷靜,可以繼續「喂」下試聲。記住遇到呢種情況,台下有人會緊張過你,所以唔需要緊張。另外,拍mic呢個動作會影響mic頭既線路結構,雖然拍一兩下係唔會甘易整壞,但如果枝mic每日有好多人要用,每人拍兩下,時間耐左就係一個大問題。 唔好嗌拆枝mic 早年入舞台睇一啲大學聯校band so,dan so, mu so既節目,總有一兩個唔知咩來歷既二線DJ做主持,最鍾意係台上好hyper咁嗌拆枝mic就當好有氣氛。所謂「拆」即係mic既信號到頂了(Peak),超載變成方波「square wave」,聽起黎就係個聲爛左。如果信號係短時間突然嚴重超載,唔單只爛聲,有機會會「燒」喇叭,而且會損害觀眾既聽覺。 再者,係正規表演場地,係有人控制同避免用mic者突然聲線暴走既,所以係呢種情況下,你越係大大力叫,個聲會越被拉低,最後只會徒勞無功。所以如果你想要自己個音量可以去到容許下最大,就要同控制人員夾一夾,所以試mic既過程好重要,請留意下一點: 彩排試mic唔該用真聲 試mic出名有盧海鵬,如果你唔係盧海鵬,試mic都係講返你要講既台詞,用返你將會用既聲線,或者主動告知控制人員你想要飆個咩音量。事前充分既溝通有助你表演順利進行,而唔會無故「被減聲」。 . 正確握mic方法 . 錯誤握mic方法 . 揸mic唔好揸mic頭 可能有啲特別既揸mic手勢有助你增加台風,但揸mic最好都係握住mic身而唔係個mic頭。一般手揸mic(handheld mic)個設計都係所謂心形指向(cardiod,令枝mic只會收取軸心指向既位置)。但呢個特性通常都需要mic頭底部位置保持開放以完成抵消既過程。一旦你揸住呢個位,會阻隔呢個機制,然後枝mic既指向方式會變成全方位(omini directional),除了更加容易feedback,連個音色都會改變! . 文:Kenji 圖片來源:soundonsound.com,網路

[國際標準?] 從格林美獎(Grammy Award)睇返香港音樂頒獎典禮

年尾又係各大音樂獎項出爐既時候,但睇左咁多年頒獎典禮,唔少人都係會一路睇一路鬧,唔係話啲獎唔夠全面,就係話頒獎機構公信力唔夠,甚至「造馬」。有時企係頒獎機構既立場睇,小編都明白點做都總有人不滿。不過係咪完全無檢討空間先?又唔係喔,至少我地望望地球另一邊既美帝,全球關注既音樂奧斯卡 —— 格林美獎(Grammy Award)就有大把野偷師啦。睇睇以下呢張示意圖,你就可以見到幾點分別:     評選資格 格林美係由唱片公司或音樂出版機構主動向格林美提交,只要係一首有版權既作品基本上已經可以入圍進行評選。入圍作品再由一班具「專業資格既業內人士」(主要係錄音學院成員)成立選委進行三輪既遴選,得出最後結果。所以原則上格林美屬於「小圈子選舉」,但呢個小圈子係構成美國流行音樂圈子既主體,自然具有相當程度公信力;而香港既獎項係根據電台播放率,網上投票,現場投票,得出「十大」或者「最受歡迎」等同數據掛勾既獎項,但其實有部分獎項既金,銀,銅獎依據就顯得比較模糊,總括而言就係根據「人氣」而定。   音樂類型 格林美會根據音樂風格(Genre),由主流的Rock,Pop,Classical,Hiphop到Musical,World music 甚至New age,Children(兒歌)等等分類歌曲和專輯(album)再設獎項;而香港,似乎只有一大類,就係Canto Pop,最多係具某種風格元素既Canto Pop,因為只有個別藝人會有鮮明既音樂風格。通常一張唱片裡面,可以搵到唔同風格既歌曲共冶一爐 。   獎項類型 除左音樂風格既分類,格林美亦有設最佳演出,製作人員(作曲,編曲,監製),工程人員(錄音師,混音師,母帶處理,環繞聲混音),甚至唱片包裝,內頁設計等獎項;香港主要係歌曲獎項,另有 唱片,個人(男,女歌手),組合和製作人員(監製,作曲,編曲,填詞),個別比較有創意既例如:四台聯頒,飛躍,或者專為歌手而設既一個獎項,一於「人人有獎,永不落空」。     文:Kenji 圖片來源:Grammy.org,網絡