用mic的基本禮儀

 

無錯,就如同用餐要講禮儀,用mic都要講禮儀。雖然你未必有機會上台用mic表演,但K房你都總會去掛?除左做個識用mic之人,留意有以下例子既突發情況出現時,都懂得掩耳以保障聽覺及身心靈健康。

  12483409_10153886711931663_872039069_n

嚴禁拍mic

拍mic係大忌中既大忌,因為枝mic其實係接通住可以產生巨響既喇叭,而喇叭係接通住聽眾既耳膜,你大大力拍落去,等同於一巴打落聽眾對耳仔。如果枝mic無聲,可能係你未開mic;如果枝mic無明顯開關,咁就代表有人會開俾你,保持冷靜,可以繼續「喂」下試聲。記住遇到呢種情況,台下有人會緊張過你,所以唔需要緊張。另外,拍mic呢個動作會影響mic頭既線路結構,雖然拍一兩下係唔會甘易整壞,但如果枝mic每日有好多人要用,每人拍兩下,時間耐左就係一個大問題。

screaming-into-microphone

唔好嗌拆枝mic

早年入舞台睇一啲大學聯校band so,dan so, mu so既節目,總有一兩個唔知咩來歷既二線DJ做主持,最鍾意係台上好hyper咁嗌拆枝mic就當好有氣氛。所謂「拆」即係mic既信號到頂了(Peak),超載變成方波「square wave」,聽起黎就係個聲爛左。如果信號係短時間突然嚴重超載,唔單只爛聲,有機會會「燒」喇叭,而且會損害觀眾既聽覺。
再者,係正規表演場地,係有人控制同避免用mic者突然聲線暴走既,所以係呢種情況下,你越係大大力叫,個聲會越被拉低,最後只會徒勞無功。所以如果你想要自己個音量可以去到容許下最大,就要同控制人員夾一夾,所以試mic既過程好重要,請留意下一點:
10470

彩排試mic唔該用真聲

試mic出名有盧海鵬,如果你唔係盧海鵬,試mic都係講返你要講既台詞,用返你將會用既聲線,或者主動告知控制人員你想要飆個咩音量。事前充分既溝通有助你表演順利進行,而唔會無故「被減聲」。
.
Feedback_04a_0 正確握mic方法
.
Feedback_04b_0 錯誤握mic方法
.

揸mic唔好揸mic頭

可能有啲特別既揸mic手勢有助你增加台風,但揸mic最好都係握住mic身而唔係個mic頭。一般手揸mic(handheld mic)個設計都係所謂心形指向(cardiod,令枝mic只會收取軸心指向既位置)。但呢個特性通常都需要mic頭底部位置保持開放以完成抵消既過程。一旦你揸住呢個位,會阻隔呢個機制,然後枝mic既指向方式會變成全方位(omini directional),除了更加容易feedback,連個音色都會改變!
.
文:Kenji
圖片來源:soundonsound.com,網路