【心理戰】如何自我提升音樂創作效率

近年接觸唔少音樂人,創作人,發現有一個普遍嘅現象:技巧好成熟,音樂底子好厚嘅人寫歌往往陷於難產,好耐都寫唔到新歌;反而有啲技巧較幼嫩,聲稱自學結他或鋼琴嘅朋友反而新作不斷,甚至可以寫到搶耳嘅旋律。積極啲去諗,排除所謂「天份嘅問題」,其實有咩因素影響緊一個人嘅創作靈感?同埋有乜方法可以自我提升創作嘅效率呢?

 

自我要求太高,開工但唔想收工

首先搞清楚你自己係咪呢類人。當然對自己有要求絕對係好事,但係創作上未必每個細節都要咁完美無瑕,通常見識過越多「好嘢」嘅人就越會有呢個心魔:一句motive發展得幾句,又覺得唔知似邊首歌,或者比唔上人地寫果啲;編曲揀隻聲搞左半日,聽落又覺得唔好停左係度;一首歌永遠埋唔到尾,因為想改到最好先… 雖然呢啲樽頸位對創作者嚟講好常見,但係典型自我要求太高者,技巧同見識越高反而沖破唔到。

對於呢種情況,解決嘅關鍵可能就在於你肯唔肯「妥協」。同自我妥協,就算某段旋律或處理唔太滿意,唔緊要,搵個折衷方案“hea”過。保持一個「我開工,係要收工架!」嘅心態,盡量係一段時間內完成所有部分,將你嘅心血定型,成為一首完整嘅歌,然後回過頭嚟再聽再細執返! 就算最後首歌都係唔滿意,唔派出街,但可能佢會繼續觸發你嘅靈感,話唔定因此做多另一首歌出呢。

 

「如果有好多時間,好多器材俾我,我就可以做到好歌」

呢種想法通常會係啱啱捱過deadline交貨嘅朋友最大嘅慨嘆。但係好明顯呢個都係偽命題,通常一個人嘅時間同資源都有限,再加上你侷限係現階段嘅才能,音質上可以達到嘅效果可以話從一開始已經「封頂」,你最多只可以做到咁。而且除非你係一個相當自律嘅人,否則係未見deadline前你都懶懶閒,或者好似上一個情況咁,不斷同心魔戰鬥同埋首去搞你啲plugin。

但係好彩,音樂本身嘅質素並唔完全受以上硬件因素影響,如果你用電腦作曲的話,可能將多啲focus擺係音樂結構,編曲配器,同和弦運用上面,好過一開始就無休止斟酌隻聲,要點搞mixing– 器材太多反而令人應接不暇。再者原來係「趕deadline」嘅情況下,時間越少,你焗住要「妥協」,要收工,反而達至上一點提及嘅效果,況且有時候靈感話嚟就嚟,同你有幾多時間無關。

 

設定限制俾自己,搵人俾壓力自己

所以,承接上點,你會發現deadline同「缺乏」反而係你創作上嘅朋友。如果你想提升自己創作嘅效率,何不妨試試逆向思維,減少你要坐定定去作歌嘅時間,同埋盡量係創作嘅階段唔好搞咁多「機」。例如一日裏面,你只係用一,兩個鐘頭時間坐係電腦前面,熄電話,唔上網,專注完成一小部分,無論寫得好唔好都要完成佢,然後一個禮拜後要完成一首完整嘅歌;創作時候用嘅樂器聲最好之前已經準備定一堆,唔同類型樂器或效果都要有啲,而且堅持作曲期間唔花時間去調教咁多。

如果你真係有心魔難以克服,可以試下搵個志同道合嘅朋友,或者嚴格嘅老師,提醒自己要交歌之餘,仲可以交換意見,除左係俾壓力自己,仲可以互相激發靈感,衝破創作嘅樽頸位。

 

慢慢建立創作習慣,最後可以駕馭自己時間/器材/質素嘅比例

最後,講左咁多,其實呢啲方案都只係過度性,係幫助你馴服自己嘅心魔,培養良好創作習慣,釋放潛藏嘅音樂靈感。嚟到呢一步,你會見到所謂作品質素可能係等於: 創作效率 x(時間+器材),即係當你可以達到一個穩定嘅創作效率時,你投入越多時間同越好嘅器材,作品質素係可以成正比,大大提升。而唔會好似難產期裏面,無論你投入幾多時間同器材,由於創作效率係零或者極低而做唔到好嘅作品。

 

文:Kenji

圖片來源:sound on sound, 網絡