【Twins 電音新嘗試】Vocoder 定 Auto-Tune?

成日有人話本地二人組合Twins無唱功,走音,但係聽完佢地最近呢隻”#LOL”現場大碟之後,你會驚嘆原來二人一直收收埋埋自己係音樂上嘅見識同追求!因為今次佢地大膽嘗試將成隻碟嘅主音人聲都做咗Vocoder處理--係編曲同混音界嚟講簡直就係一個具實驗性嘅前衛作品,一齊嚟聽聽其中呢首名曲「風箏與風」處理後嘅版本:

如果要我搵一首近期可以拍得住Twins呢個處理嘅作品,我會首選法國電子組合Daft Punk早兩年勇奪格林美最佳大碟“Random Access Memories”裏面嘅“Doin’ it Right:

聽完兩首歌後作比較,可能Twins嘅效果會嚟得再自然少少。皆因佢地將Vocoder嘅份量調節得恰到好處,時有時無,約隱約現咁相當有趣,以致於好多人都唔明Twins嘅用心,以為佢地係做咗所謂“Pitch Correction”嘅處理去執走音啊… 當然兩者之間係有密不可分嘅關係。

 

Vocoder vs Auto-Tune

我地平時聽到嘅音樂係由一連串樂音組成,所謂每個「音」其實都係一個具有週期性頻率嘅震動,可以稱為基本頻率(基頻)“Fundermental Frequency”,例如當你去唱一個440Hz嘅A音,係由聲帶進行每秒440次震動發出。但原來除咗基頻,仲有好多同佢有關係嘅額外頻率產生--諧波“Harmonics”。唔同發聲物體本身嘅質地,震動模式唔同,產生嘅諧波樣式“Harmonics Spectrum”都唔同。呢個係令我地區分到唔同樂器及唔同聲線嘅主要原因(亦即係音色“Timbre”)。

k1

Korg VC-10 Vocoder

好似Vocoder一類嘅音頻處理器,簡單嚟講主要係將人聲嘅諧波樣式進行改動,將佢變得聽起來好有趣。方法有很多,早期會用sythnsizer(合成器), “Talk box”之類硬件將信號經過線路扭曲,到宜家係電腦用plugin直接修改頻率及相關參數。

 

autotunesnap

Auto-Tune 8

 

而所謂“Pitch Correction”嘅處理,最出名有Antares Audio公司出品嘅“Auto-Tune” plugin,簡直係家傳戶曉。佢嘅做法主要係改動人聲裏面嘅基頻,例如要唱一個440Hz嘅A音,但歌手由於某啲原因,只能夠發到一個420Hz震動,於是AutoTune會混算並強行將420嘅波形修改為440Hz,由於本身嘅諧波樣式唔配合,或者頻率相去太遠,由電子模擬真聲嘅過程會導致一啲唔自然嘅扭曲,成為類似機械人Robot嘅效果無法避免。但好在技術越嚟越先進,加上大量真聲嘅數據分析,呢類型嘅處理做得越嚟越好,只要混音師有耐性調節參數,似乎都可以化腐朽為神奇… 當然前提係唔好走音走得太過份啦!(如果係咁點解唔重錄呢?)

 

文:Kenji

資料及圖片來源:互聯網