【解迷】點解會俾《神奇女俠》嘅主題曲洗腦?

睇落去之前,聽咗呢首曲先!

冇錯,今日我想研究下 Wonder Woman 主題曲嘅力量!

相信鍾意DC 嘅fans、鍾意睇超級英雄戲嘅朋友、或鍾意睇靚女做動作戲嘅你(大家唔好諗歪😏),都已經睇咗上映近一個月嘅《神奇女俠》;又或者你係上年嘅《蝙蝠俠對超人》入面都見過超搶戲嘅Diana 登場。小編覺得佢咁搶戲除咗因為佢夠索之外,好大原因係佢有一首超級上腦嘅主題曲。(當然仲有其他原因:佢勁抽、成套 BvS 都編得太亂,套戲冇乜其他易上腦嘅音樂…)咁點解呢首主題曲咁上腦呢?小編認為主要有三點:

1. 電子大提琴 x Metal Rock

首先最容易察覺係Metal Rock構成嘅氛圍。尤其是當整套戲都係由管弦樂器嚟做配樂,一首Metal 足以留下深刻印象。

2. 唔協調 x 和諧

再稍作分析,就會發現其實旋律主幹只係由五個音組成。其中頭三粒同最尾一粒音都係屬於同一個三和弦,而第四粒音就係所謂「撞音」,亦都係主題中最上腦嘅部分。

人係好奇怪嘅生物,喜歡留意唔和諧嘅嘢,然後將唔和諧變成和諧就會得到滿足感。而係今次呢段主題曲入面,呢個唔和諧嘅音「擾攘」咗兩個小節(佔成句嘅一半)後,終於帶返我哋入和絃,於是我地就覺得非常美好,非常上腦。

3. 7拍複節奏

跟住落嚟係比較深嘅一環,就係節拍。大家最常聽見嘅拍子係四拍,因為差唔多全部流行曲都係用四拍編寫嘅(你睇吓上榜新曲邊首唔係四拍嘅?)。就算係著名主題音樂都鍾意用四拍(如星球大戰、蜘蛛俠、加勒比海盜、鐵達尼號……)。所以用7拍編寫嘅神奇女俠主題,會顯得更特別,更加容易令人上腦。

不過7拍雖然唔常見,但都唔係罕有。究竟仲有乜嘢可以令到今次呢個7拍主題特別突出呢?答案就係2+2+3呢一組不停重複、用鼓同低音樂器大大力「鋤」嘅重拍

其實2+2+3都係一種不和諧。因為雙數+雙數+單數=單數,而單數起音樂上會產生不平衡感(除咗三嘅陪數以外)。另外,短+短+長可以令人產生期待與懸念,最後用上大力嘅重拍鞏固不和諧感,就可以令呢種期待同懸念轉化為興奮同刺激。於是,就算你行出戲院之後,短短長呢個節奏都可以繼續係腦中迴響。

不過,原來呢五個音嘅主題已經俾好多唔同嘅電影女主角用過㗎啦。睇埋下邊條片,包保你大開眼界!

 

文:KrisY

資料及圖片來源:互聯網