走進著名混音工程師Simon Li的工作室，眼前的佈置儼如一個充滿異國風情的靈修室：一排排鮮豔奪目的的蠟燈襯托著牆上懸掛的吉卜賽式毛毯，大量outboard處理器跳動的閃燈，機身的微溫，混和著空氣中一股香薰蠟燭的味道－－這種氣氛使人入迷，意識被鎖定在眼前的空間，似乎準備好隨時跳進鑑聽喇叭精準的聲浪裡，慢動作觀察每個頻段的細節... 本來這是一個大好的畫面配合接下來的訪問，亦足以幻化一個錄音室工程人員的工作。但他卻在這時候提議我們去喝一杯咖啡……
關於Simon Li
自由身混音工程師，十幾歲的時候移民去了加拿大，在那裡上完了大學。然後去了佛羅里達的奧蘭多市的Full Sail學校參加一個為期13個月的音頻工程學習課程。大概在1997年回流香港，在一間大型錄音室擔任音頻工程師。在這三四年期間他接觸和嘗試了大量的錄音設備和工具。其後離開了該錄音室並在2006年成立了自己的錄音室“nOiz”，至今20年間參與無數流行曲的製作工作。最近參與項目包括Rubber Band及張敬軒的單曲混音及韓紅的大碟製作。
OUTBOARD專家；主動邀約試機，唔信外國FORUM
訪問的位置由混音工作室改為Simon日常起居的偏廳，有著同樣考究的佈置，可見主人家並不是一個「求其」的生活態度。工作上亦然，因應混音的需要，Simon使用很多outboard處理器，擁有大量的收藏，其中不乏經典又罕有的型號。因此他對外國音頻廠牌非常熟悉，經常直接就電郵聯絡生產商提出試機的要求。但他認為這是無可奈何：「香港唔似人地美國，啲廠一出新機就會全國錄音室touring去俾啲engineer試」。Simon承認不是所有公司都會理會他，不少回覆是叫他去找地區代理。但他有個「祕技」：「我會提議俾錢對方先，如果試用之後唔滿意，我自己承擔運費將件產品退返去再退錢。」他甚至有自己的fedex戶口專門處理這件事。
Simon認為時代不同了，網絡的便利令他更加容易找到心儀產品的資訊。雖然網上有很多論壇有人分享用機的經驗，亦不減他想親自試機的意欲，因為他對這些網上的意見都持保留的態度：「通常啲人都有背後動機，香港用嘅字眼可能係『打手』，外國就係嗰個人買左部機就會讚，甚至dealer本身係度讚。好少見人上forum講自己買錯嘢。又或者佢地真係覺得正，但每個人嘅情況同需要都唔同，好主觀。有部機好fit你嘅需要，並唔代表對我嘅情況會work，可能我client唔覺得ok呢，所以講到底都係要試。」
求「真」的工作態度：PLUGIN仿真，不如用真
有傳Simon唔用plugin做歌，他笑稱：「係咩？隻隻歌都有用喔。」對於有不少模擬經典outboard聲音的plugin大行其道，很多用家認為有8，9成似已經「夠做」。Simon這樣回應：「我都係果句，每個人嘅情況唔同，好視乎果個人對呢件事嘅重視程度。如果你講得係“似”，就唔係真正嗰樣野，你就要衡量係咪要用代替品。」，「我明啊，99美金就買到plugin，做出黎嘅效果覺得人地聽唔出。但重點係，用咁嘅態度去做音樂，無論係咩位置嘅人，作曲，編曲，監製，咁做音樂嘅話不如轉行啦！」
他進一步解釋：「近年接觸新啲嘅編曲人，音樂人，其實有唔少好嘅想法，但佢地一接觸音樂嘅時候就係”home studio”年代，用plugin，好似要睇住個mon先做到音樂。但音樂唔係用嚟睇，係聽架！」，「我會提佢地，你地用緊嘅係一個代替品，無論係soft synth又好，plugin都好，只係去模仿某件存在嘅產品，如果有機會應該去聽聽真正嗰隻聲。」
至於預算有限的朋友，Simon的建議也很實際：「如果你暫時唔夠錢買，不如唔好買，儲多啲錢先買。你走去買個quality唔好嘅嘢返嚟無意思，遲早你都會覺得唔夠做要去買件好嘅。不過我都明白，有時可能急用，唯有『袋住先』，我就唔建議喇。」
「無錢，無名，無RESPECT，如果唔係中意，傻嘅先會做落去」
Simon不斷強調做音樂做製作需要興趣及熱誠，但如果現在的年輕人缺乏這方面的熱誠，是否因為市場萎縮，音樂製作人的地位和待遇不及以前所導致？在香港唱片市場發展尚算蓬勃的90年代已經在大型錄音室裡面工作的Simon，聽到小編這個假設瞪大雙眼，顯得十分驚訝：「從來都無！呢一行，錄音室engineer，我從來都唔覺得有地位，尤其係香港。」
「我講個故事俾你聽，當年我離開嗰間大錄音室之前，曾經同一個新人講過一番說話。我問佢『你做乜入行？你做乜嚟呢個地方做呢份工？你係咪好清楚呢份工期待你做嘅嘢係乜？你從呢一刻開始，錢就唔會有啦，名你都唔會有，如果你唔係百分百中意做呢樣嘢，你係咪有需要轉過另外一份工？』」
Simon的唏噓由心而發，他所講的「錢唔會有」大概是不能夠賺大錢的意思。但恐怕引用到現在的情況，就真是「無錢」，因為很多人面對開工不足。「外國呢條路唔會好似香港咁，錢有，名有，respect都會有」Simon說。但怎樣才算有respect？尊重的界定是什麼？
「由細到大，香港有好多音樂頒獎禮，但我從來都無聽過有邊一個會頒獎俾我地呢啲人。唔係話我「恨」攞獎，而係呢樣野話俾我地知，呢一行，音樂圈人對我地呢啲post嘅人respect有幾多。做左18年，我都唔記得mix咗幾多隻歌，有時會留意電視啲mv，出credit，曲詞編唱，髮型，化妝，茶水都會有名，唯獨是musician同我地呢啲engineer唔會出名，咁呢個尊重係有幾多呢？又要講外國，人地嘅Engineer係有版權，音樂賣到係「有得分」，又會出名又有獎攞，呢啲係咪錢有，名有，respect都有先？」
「係香港，無錢，無名，無respect，如果唔係中意，傻嘅先會做落去！」Simon了總結一句。
本末倒置的香港製作
講起香港做音樂製作的處境，Simon繼續大吐苦水：「如果你問我，我覺得混音唔係咁緊要，錄音會比較重要，但主流大部份嘅job係無人care個錄音！大部分engineer一定會同意我呢個講法，如果錄音錄得好，接近你腦裡面要果隻聲，混音就會變得好簡單，甚至mastering都可以唔做」。
「試過有個人話budget唔夠，錄音要cut，前期要cut，無錢錄真嘢，要用sample，然後問我可唔可以將啲假string聲變得真啲；套鼓錄好咗，問我可唔可以將個snare改做第二隻snare聲。而最好笑嘅係到最後收到個消息，呢隻碟會攞去外國，搵邊個邊個做mastering」，「其實做任何事都好，永遠第一步係最重要，我唔明點解你要俾錢我mix但唔搵我錄，而你開頭又話無錢，後來又有錢俾鬼佬做mastering去quote自己隻碟係天碟？」，「係近幾年發生嘅事，我唔係針對人，但做嘢係咪要咁做？我都唔明，香港人唔撐香港人，係咪我地真係咁差？咁差你又keep住搵我地做嘢？或者佢地覺得咁係一個marketing嘅考慮，有個鬼佬名就係天碟。但你想像下做嗰個人肯定掩住半邊嘴笑，求其搵個intern嚟做咗你又點會分辨到？」
興趣使然的混音工程師
雖然見盡行內種種荒誕，Simon始終熱衷於錄音室的工作。默默耕耘二十年，練就一身好武功的他是否有什麼想達成的目標呢？他的答案猶如禪師當頭棒喝：「有錢交租，有飯開，得閒買個game玩下，有嘢做，而又做得開心。就係咁簡單！」
「如果你係為左搵食去做呢樣野就唔好，第一就搵唔到食，第二就無意思，要搵食應該轉行，香港個環境，唔中意呢樣野你點會做呢，傻的嗎」
文：Kenji@KICKSOUND
圖片及資料來源：KICKSOUND，Simon Li，nOiz Facebook，bluepongpong, 網絡
p.s. 以下是simon部分的outboard收藏
